قدم مهتم مصري نصائح هامة جدا لليمنيين الراغبين في الذهاب الى مصر للعلاج حيث  كتب: Ahmed Al-hagga موضوعا هاما  بعنوان :

الاخوة اليمنيين الذي يتعالجون في مصر اقرؤا المقالة من صفحة مصري عن الطب في مصر !!

نص الموضوع :

فيه نصيحة لازم أقولها للمرضى فى مصر رغم إنى عارف إنها هتزعل دكاترة كتير :

لما دكتور يقولك إنك محتاج عملية لازم تستشير على الأقل ٣ دكاترة غيره من نفس التخصص ولو لقيت إجماع من الكل على إنه لا بديل عن العملية يبقى ساعتها توكل على الله واعمل العملية لكن غير كده لأ ..

الموضوع فعلاً وصل من بعض الدكاترة إلى درجة من الفجور غير طبيعية ..

مريضة بتشتكى من ألم فى ركبتها ولما كشفت الدكتور قالها لازم عملية والتكلفة ٧٠٠٠ جنيه .. المريضة حالتها المادية سيئة جداً فلجأت لزوجتى تترجاها نسلفها المبلغ ولما زوجتى قالتلى قلتلها مفيش مشكلة بس أتأكد الأول إنها محتاجة عملية .. تواصلت مع أحد أصدقائى ممن أثق فى علمهم وأمانتهم وأرسلت له المريضة وكانت النتيجة كما توقعت .. مجرد التهاب محتاج علاج والمريضة أخذت العلاج وبقت زى الفل ..

بقول لصديقى : أومال الدكتور اللى راحتله كان هيعمل عملية إيه ب ٧٠٠٠ جنيه ؟!!

ضحك وقالى : والله ما أعرف .. الحالة دى ملهاش عمليات أصلاً وغالباً كان هيعملها منظار ركبة بدون أى داعى علشان يقلب المريضة فى قرشين ..

وضحك وقالى : دكاترة كتير بتعمل كده دلوقتى ..

أحد أصدقائى دكتور أنف وأذن وحنجرة كان بيحكيلى على المهازل اللى بتحصل من بعض زمايله اللى مفيش مريض بيدخل عيادتهم إلا ويتقاله أنت محتاج عملية ..

ودكتور القلب اللى بيعمل لستة قسطرة كل أسبوع من غير ما يبقى فيها ولا مريض محتاج قسطرة بشهادة المساعد بتاعه اللى بيقولى : أنا حاسس إن الفلوس اللى باخدها من الشغل معاه دى حرام والله ..

لو هتكلم عن تخصصى أنا والحاجات اللى بشوفها بعينى فحدث ولا حرج :

من المواقف اللى بشوفها كل يوم بدون أى مبالغة هو مريض اتشخص إن عنده مياه بيضاء ومحتاج عملية إزالة مياه بيضاء وزرع عدسة .. ولما تكشف على المريض تكتشف إنه سليم تماماً ولا يوجد عنده أى أثر للمياه البيضاء وإنه فقط محتاج نضارة ولما تعملهاله يشوف ستة على ستة بدون أى مشاكل .. ده موقف مفيش يوم بيعدى من غير ما أشوفه بدون مبالغة والله على ما أقول شهيد ..

والأسوأ لما يتقال للمريض ده إن الحالة طارئة ولازم العملية تتعمل فى أسرع وقت ممكن طبعاً علشان المريض ما يلحقش يسأل حد تانى .. أعرف دكتور قال لمريضة إن حالتها طارئة ولو استنت للصبح ممكن تتعمى ولازم العملية تتعمل حالاً ولأن المريضة فلاحة غلبانة مش عاملة حسابها فى الفلوس فالدكتور اتنازل واتعطف ورضى إنه ياخد الحلق الدهب بتاعها رهن علشان يعملها العملية حالاً وبعدين تجيبله الفلوس وتاخد حلقها .. ده مش مشهد خزعبلى من فيلم فانتازيا ولكن موقف حقيقى والحقيقة دايماً أغرب من الخيال .. ومننساش إن ده كله فى حالة مياه بيضاء يعنى بافتراض التشخيص صح فالمريضة لو قعدت بيها ١٠ سنين من غير عمليات ولا هيجرالها أى حاجة ..

وطبعاً سبوبة الحقن داخل الجسم الزجاجى اللى بيتقال للمرضى عمال على بطال ..

جتلى مريضة عملت حقن ٨ مرات .. كل حقنة ب ٤٠٠٠ جنيه .. كل شهر حقنة على مدار ٨ شهور .. بتقولى فلوسى خلصت وكان عندى حتة دهب بعتها ومش قادرة أكمل باقى الحقن والدكتور اللى بتابع معاه قالى انتى ليكى ١٢ حقنة على ١٢ شهر .. البروتوكول كده .. وما ينفعش نكتفى بال ٨ اللى أخدتيهم وإلا يبقى كل اللى فات ضاع .. لازم نكمل البروتوكول ..

طبعاً كالمتوقع بالفحص والأشعة تبين إنها مش محتاجة حقن أصلاً ولو عملنالها حقن طبقاً لبعض الآراء هتاخد حقنة أو اتنين على أقصى تقدير .. وطبعاً مش محتاجين نقول إن البروتوكول اللى بيتكلم عنه الدكتور المحترم يبقى من اختراع سيادته ومش هتلاقيله أثر فى أى مكان فى العالم ..

أعرف مريضة عندها انفصال شبكى قديم وتليف فى الشبكية وضمور فى عصب العين ودكتور محضرها يعملها ليزك .. الدكتور بيقولها احنا هنعمل اللى علينا والباقى على ربنا ..

طبعاً دى كلمة الحق التى يراد بها باطل لأن الدكتور ده عارف يقيناً إنها مش هتشوف ومش هتستفيد أى حاجة من الليزك وإن الاستفادة الوحيدة هتكون فى المبلغ اللى سيادته هيحطه فى جيبه ..

ده غير الحالة اللى سمك القرنية فيها ٤٢٠ ميكرون والدكتور محضرها تعمل ليزك .. وطبعاً أى دكتور عيون عارف يعنى إيه الرقم ده .. يعنى إحنا مش بنتكلم هنا عن خطأ طبى ولكن دى فى رأيى جريمة مع سبق الإصرار والترصد ..

ولما تحصل مضاعفات بعد كده يقول للمريض إن دى مضاعفات وارد حدوثها لأى عملية ..

وطبعاً دى بردو كلمة الحق التى يراد بها باطل لأن طبعاً فيه مضاعفات وارد حدوثها حتى لو مريض بياخد حقنة عضل فوارد يحصل مضاعفات لكن فيه فرق بين مضاعفات بتحصل والدكتور ماشى صح والمريض محتاج العملية فعلاً وبين مضاعفات بتحصل من عملية مكانش المريض محتاجها أو مكانتش تنفعله من الأصل وما استفادش منها غير الدكتور فقط ..

أنا فى مجالى لو هتكلم لبكره الصبح فالكلام مش هيخلص ..

ولذلك أنا بكرر نصيحتى لكل مريض : لما دكتور يقولك أنت محتاج عملية اسأل ٣ دكاترة غيره ولو الكل أجمع إنك محتاج عملية توكل على الله لكن لو واحد بس قالك متعملش عمليات يبقى متعملش عمليات ..

ولو فيه فى مصر مسئول عاوز ياخد ثواب كبير ويرحم ملايين المواطنين من المتاجرة بيهم يبقى لازم يغير النظام الصحى فى مصر والدكتور يشتغل بمرتب ثابت محترم يكفيه وساعتها هيقول كل دكتور رأيه فى حالة المريض بحيادية لكن طول ما الدكتور صاحب مصلحة فى إن المريض يعمل عملية هيفضل الوضع للأسف على ما هو عليه ..

وطبعاً لازم نأكد على إن الشرفاء من الأطباء كثير جداً ولله الحمد .. وأعرف أطباء بتتكفل بعلاج المرضى وبتعملهم عمليات مجاناً .. وأعرف أطباء تتحرى الحلال فى كل جنيه .. الخير موجود كتير ولله الحمد ..

وبردو علشان ناس هيقولوا إن كده النظام فى الخليج أفضل فأنا بقول بردو نظام الخليج لأ .. لأن الدكتور هناك عنده تارجت من الربح لازم يحققه للمستشفى ولو محققوش بيتحاسب وهناك لما تقول لحالة ليزك مثلاً إن العملية متنفعش هتلاقى إدارة المستشفى بتقولك متنفعش ليه والحالة مشيت ليه .. وهناك فى معظم الأماكن الدكتور له نسبة من الدخل فبردو بيحاول يشتغل أى حاجة علشان يكسب وعلشان يرضى إدارة المستشفى علشان يجددوا عقده ..

المطلوب التجرد الكامل يعنى يبقى المريض عمل عملية أو معملش سيان بالنسبة للدكتور علشان الدكتور يقول رأيه بحيادية كاملة وعلشان متحصلش المهازل اللى بتحصل كل يوم ..

دى مش مجرد عمليات نصب لأن النصاب بياخد منك فلوس وخلاص لكن الدكتور اللى بيدخلك أوضة العمليات بدون داعى مش بس بياخد منك فلوس لكن كمان بيعرضك لكل مضاعفات التخدير والجراحة بدون أى داعى ..

كلمتين حبيت أقولهم لوجه الله والله على ما أقول شهيد ..