يا جماعة الخير، مالكم مستغربين ومسوينها قصة ورواية كبرتم موضوع انشقاق شجرة الغريب في تعز؟ أيش فيها يعني؟ شيء طبيعي جدًا في بلدنا المبارك! نحن أمة "الدبل" بامتياز، كل شيء عندنا لازم يكون نسختين عشان "التنوع" و"إثراء التجربة"!
عندنا حكومة "أصلية" في عدن وحكومة "تقليد" في صنعاء، وكل واحدة تقول الزين عندي وأنا الصح والبقية غلط. وعندنا عملة "شرعية" وعملة "غير شرعية"، وكل واحدة بقيمة مزاجية، مرة فوق ومرة تحت، تحسب إنك في بورصة عشوائية! وعندنا بنك مركزي "هنا" وبنك مركزي "هناك"، وكل واحد يطبع فلوس على ذوقه، ما شاء الله، الخير يفيض!
يعني بالله عليكم، في ظل هذا الجو العام من "التوأمة القسرية"، تستغربون من شجرة قررت هي كمان تنقسم عشان تكون "مواكبة للعصر"؟ الشجرة أذكى من كثير من "المحللين الاستراتيجيين" اللي عندنا، فهمت اللعبة صح! قالت: "ليش أنا أكون شجرة وحدة مملة؟ خليني أنقسم وأصير شجرتين، وحدة تمثل الشمال ووحدة تمثل الجنوب، عشان ما حد يزعل!".
أصلًا أنا أقول لكم، لو الشجرة عندها لسان كان زمانها طلعت بيانًا رسميًا تقول فيه إن انشقاقها جاء "استجابة لتطلعات الشعب اليمني" و"تعبيرًا عن الوحدة الوطنية بشكل جديد ومبتكر"! ويمكن كمان كانت طلبت من الأمم المتحدة إرسال مبعوث خاص لمراقبة عملية الانشطار "بشفافية ونزاهة"!
لا تستغربوا إذا بكرة سمعنا إن جبل صبر قرر ينقسم نصين، نص فيه منتجعات خمس نجوم ونص فيه مخيمات للنازحين، عشان "التوازن" في التنمية! ولا تستغربوا إذا الشمس طلعت من الشرق والغرب في نفس الوقت، عشان "إرضاء جميع الأطراف"!
يا جماعة، نحن شعب "الدبل" في كل شيء، حتى في المصائب! عندنا حرب "أهلية" بنكهة "إقليمية" بتوابل "دولية"! يعني مصيبة "ثلاثية الأبعاد"!
فبدل ما أنتم ماسكين لي في شجرة انشقت، شوفوا الكارثة اللي عايشينها! بلد منقسم على نفسه في كل شيء، وأنتم مستغربين من شجرة قررت تعمل "نيو لوك"؟ الشجرة على الأقل انقسمت بشكل واضح ومفهوم، لكن انقسامنا نحن معقد ومتشابك لدرجة إن الواحد يحتاج قاموسًا لفهمه!
الخلاصة، شجرة الغريب ما ارتكبت جريمة، هي بس حبت تكون جزءًا من "الهوية اليمنية الجديدة" القائمة على مبدأ "كل شيء اثنين في واحد"! فبدل الاستغراب، قولوا لها: "يا شجرة، أنتِ خير من يمثلنا في هذا الزمن الأعوج!". ويمكن بكرة تطلع لنا شجرة ثالثة تمثل "الرأي الآخر" ونصير "دولة الأشجار الثلاثية"!
-->
